தமிழ் மொழி தின சிறப்பு நிகழ்வு

உலக தாய்மொழி தினத்தையொட்டி மட்டக்களப்பில் தமிழ் மொழி தின சிறப்பு நிகழ்வுவொன்று  தமிழ் உணர்வாளர்கள் அமைப்பினால் நடாத்தப்பட்டது. 

மட்/செங்கலடிச்செல்லம் பிரிமியர் மண்டபத்தில் தமிழ் உணர்வாளர்கள் அமைப்பின் தலைவர் மோகன் தலைமையில் இடம்பெற்ற இந்நிகழ்வில் சிறப்பு    விருந்தினர்களாக பாராளுமன்ற உறுப்பினர்கள்

சந்திரகாந்தன், சாணக்கியன், முன்னாள் பாராளுமன்ற உறுப்பினர் பசீர் சேகுதாவுத் போன்றோர் கலந்துகொண்டு உரையாற்றினர். மேலும் பல எழுத்தாளர்கழும் அறிஞர்களும்  கெளரவிக்கப்பட்டனர்.

»»  (மேலும்)

உயிர்த்த ஞாயிறு தாக்குதல்; 32 பேருக்கு நேரடி தொடர்பு குற்றச்சாட்டு

உயிர்த்த ஞாயிறுதின தாக்குதலில் 32 பேர் நேரடியாக மனிதப் படுகொலையாளிகளாகவும் தாக்குதல்களை திட்டம் தீட்டியவர்களாகவும் குற்றஞ்சாட்டப்படவுள்ளதுடன், தாக்குதல்களுடன் தொடர்புற்று தடுத்து வைக்கப்பட்டுள்ள 241 பேர் மீதும் வழக்கு தொடரப்படவுள்ளதாக பொது மக்கள் பாதுகாப்பு அமைச்சர் சரத் வீரசேகர தெரிவித்துள்ளார்.

தாக்குதல்களுடன் தொடர்புடைய 273 சந்தேகநபர்களுக்கு எதிராக சட்ட நடவடிக்கை எடுக்கப்படவுள்ளதாகவும் அவர் தெரிவித்தார்.

அது தொடர்பில் அவர் மேலும் கூறியதாவது,

குற்றப்புலனாய்வுப் பிரிவினர் நடத்திய விசாரணைகள் தொடர்பாக தயாரிக்கப்பட்ட எட்டு கோப்புகள் ஏற்கனவே சட்ட மாஅதிபருக்கு அனுப்பப்பட்டுள்ளன.

குற்றப்புலனாய்வுப் பிரிவினரின் விசாரணைகளின் பிரகாரம் 'நல்லாட்சி' அரசாங்கத்தின் பல பிரபல அரசியல்வாதிகள் மற்றும் பல சிரேஷ்ட பொலிஸ் அதிகாரிகள் நேரடியாக அந்த சம்பவத்தில் குற்றஞ்சாட்டப்பட்டுள்ளனர். குறிப்பாக தாக்குதலைத் தடுக்கத் தவறியது தொடர்பான குற்றச்சாட்டுகள் தீவிரமானவையென குற்றப்புலனாய்வுப் பிரிவினர் தெரிவித்துள்ளனர்.

உயிர்த்த ஞாயிறுதின தாக்குதல்களுடன் தொடர்புடைய ஜனாதிபதி ஆணைக்குழுவின் விசாரணை அறிக்கை எதிர்காலத்தில் பாராளுமன்றத்தில் சமர்ப்பிக்கப்படும்.

தாக்குதல்கள் தொடர்பாக 754 பேர் இதுவரை கைது செய்யப்பட்டுள்ளதாகவும், மீதமுள்ளவர்கள் விசாரிக்கப்பட்டு குற்றச்சாட்டுகளுடன் தொடர்பு படாவிடின் விடுவிக்கப்பட்டவுள்ளதாகவும் அமைச்சர் மேலும் தெரிவித்துள்ளார்.

இதற்கிடையில், உயிர்த்த ஞாயிறுதின தாக்குதல்கள் தொடர்பான விசாரணையின் அறிக்கையையும், தேசிய பாதுகாப்பு தொடர்பான துறை மேற்பார்வைக் குழுவின் அறிக்கையையும் ஆய்வு செய்ய ஜனாதிபதி கோட்டாபய ராஜபக்ஷ, அமைச்சர் சாமல் ராஜபக்ஷ தலைமையில் ஒரு குழுவை நியமித்துள்ளாரென்பதும் குறிப்பிடத்தக்கது.

»»  (மேலும்)

நெற்களஞ்சிய சாலை திறப்பு

இன்று உணவுக் களஞ்சியசாலையொன்று மட்டக்களப்பு கள்ளியங்காடு பிரதேசத்தில் திறந்து வைக்கப்பட்டது. வர்த்தக வாணிப அமைச்சர் கௌரவ பந்துல குணவர்தன அவர்களினால் இந்த உணவுக் களஞ்சியசாலை திறந்து வைக்கப்பட்டது என்பது குறிப்பிடத்தக்கது.

யுத்தகாலத்திலிருந்து நீண்டகாலமாக கைவிடப்பட்டுக்கிடந்த இந்த கட்டடமானது புனரமைக்கப்பட்டு மக்களின் மீளுருவாக்கப்பட்டுள்ளது.

இதன் மூலம் எமது மட்டக்களப்பில் காணப்படக்கூடிய விவசாயிகள் தங்களது நெல்லை அரசாங்கத்திற்கு விற்பனை செய்வதன் மூலம் நியாயமான விலையை பெற்றுக்கொள்ள கூடிய சூழ்நிலையும் அதேபோன்று நெல்லை பாதுகாப்பாக களஞ்சியப் படுத்தக்கூடிய நவீன வசதிகளை கொண்ட இடமாகவும் இது திகழவிருக்கின்றமை குறிப்பிடத்தக்கது.

»»  (மேலும்)

மட்டக்களப்பில் எதிர்வரும் ஏப்ரல் மாதமளவில் சதோச விற்பனை நிலையங்கள்

மட்டக்களப்பு மாவட்டத்திற்கு வருகை தந்த வர்த்தக வாணிப அமைச்சர் பந்துல குணவர்த்தன அவர்களால் மட்டக்களப்பு மாநகரத்தில் #சதோச பிராந்திய அலுவலகமும் அதே போன்று மட்டக்களப்பு மாவட்டத்தின் ஏனைய 6 முக்கிய நகரங்களில விற்பனை நிலையங்களையும் எதிர்வரும் மாதங்களில் அமைப்பதற்கான திட்டங்கள் தொடர்பான கலந்துரையாடல்கள் இடம்பெற்றுள்ளன. மேற்படி கலந்துரையாடலானது மட்டக்களப்புக்கு விஜயம் செய்துள்ள வாணிப அமைச்சர் பந்துல குணவர்த்தன அவர்களுடன் மட்டக்களப்பு மாவட்ட அபிவிருத்தி குழுத்தலைவர் சந்திரகாந்தன் தலைமையில் மாவட்ட செயலாளர் மற்றும் அதிகாரிகள் உள்ளடங்கலான குழுவுடன் இடம்பெற்றது.

இக்கூட்டத்தின்போது மட்டக்களப்பில் எதிர்வரும் ஏப்ரல் மாதமளவில் சதோச விற்பனை நிலையங்கள் சாத்தியப்பாடுகள் குறித்து ஆராயப்பட்டுள்ளது.

»»  (மேலும்)

‘சீனோப்பியா’ வியாதிக்கான காரணங்கள் - தோழர் மணியம் சண்முகம்

இலங்கையின் வட பகுதியில் உள்ள மூன்று தீவுகளில் மின்நிலையங்களை நிறுவுவதற்கு இலங்கை அரசாங்கம் சீன நிறுவனம் ஒன்றுடன் ஒப்பந்தம் செய்ததைத் தொடர்ந்து, தமிழ் அரசியல்வாதிகள் தமது வேற்றுமைகளை ஒருபக்கம் ஒதுக்கி வைத்துவிட்டு, ‘இதனால் இந்தியாவுக்கு ஆபத்து!’ என சீனாவுக்கு எதிராகவும் இலங்கை அரசுக்கு எதிராகவும் வசைபாடத் தொடங்கியிருக்கிறார்கள். (ஆனால் இதே அரசியல்வாதிகள்தான் புலிகள் இந்தியாவுடன் யுத்தம் செய்தபோது விழுந்து கட்டிக்கொண்டு அதையும் ஆதரித்தவர்கள். அப்பொழுது இந்த இந்தியப் பாசம் எங்கே ஓடி ஒளித்ததோ தெரியவில்லை)

இலங்கை இந்தியாவின் ஒரு பகுதி அல்ல. அது இறைமையுள்ள ஒரு நாடு. தீவுகளில் மின்நிலையங்களை நிறுவுவதற்கு இலங்கை அரசு சீனாவுக்கு இரகசியமாகக் கொடுத்துவிடவில்லை என்றும், சர்வதேச நியதிகளின்படி பகிரங்கமாக கேள்விப்பத்திரம் வெளியிட்டு அதன் அடிப்படையிலேயே வழங்கப்பட்டதாகவும் அரசாங்கம் தெளிவுபடுத்திய பின்பும், சீனா இவற்றை நிறுவுவதால் இந்தியாவுக்கு ஆபத்து என இந்தத் தமிழ் அரசியல்வாதிகள் புலம்பிய வண்ணம் உள்ளனர். அப்படியானால் இலங்கை கேள்விப்பத்திரம் வெளியிட்டபோது சீனாவை முந்திக்கொண்டு இந்தியா அந்த உரிமத்தைப் பெற்றிருக்கலாம்தானே? ஏன் பெற முடியவில்லை? யார் தடுத்தார்கள்?

இலங்கைத் தமிழர்களில் ஒரு பகுதியினருக்கு இந்த சீன விரோதக் காய்ச்சல் இன்று நேற்று ஏற்பட்டதல்ல. 1956இல் பண்டாரநாயக்க ஆட்சிக்கு வந்ததும் இலங்கையின் தேசிய சுதந்திரத்தையும் இறைமையையும் சுயாதிபத்தியத்தையும் பாதுகாப்பதறகாக சில நடவடிக்கைகளை எடுத்தார். அதில் ஒன்று கட்டுநாயக்காவிலும் திரிகோணமலையிலும் இருந்த பிரித்தானிய இராணுவத் தளங்களை வெளியேற்றியது. அந்த நேரத்தில் தமிழரசுக் கட்சித் தலைவர் செல்வநாயகம் பிரித்தானியா தனது தளங்களை வெளியேற்ற வேண்டாம் எனக்கோரி எலிசபெத் மகாராணிக்கு தந்தி அனுப்பினார்! என்னே தேசபக்தி!! (உண்மையான இந்தியக் காந்நி “வெள்ளையனே வெளியேறு!” எனக் கூற, இந்த போலி ஈழத்துக் காந்தி “வெள்ளையனே வெளியேறாதே!” என்று கூறியிருக்கிறார்.)

அன்றிலிருந்து திரிகோணமலை துறைமுகத்தை பண்டாரநாயக்காக்களின் அரசுகள் சீனாவுக்கு கொடுக்கப்போகின்றன என தமிழரசுக் கட்சியினர் தொடர்ந்து பிரச்சாரம் செய்து வருகின்றனர். ஆனால் இன்றுவரை அப்படி எதுவும் நடக்கவில்லை. மாறாக, திரிகோணமலை – சீனன்குடாவில் உள்ள எண்ணெய் குதங்கள் இந்தியாவுக்குத்தான் கொடுக்கப்பட்டுள்ளன. அதுமாத்திரமின்றி, தமிழரசுக் கட்சி ஆதரவு வழங்கிய கடந்த ‘நல்லாட்சி’ அரசு திரிகோணமலை துறைமுகத்தில் அமெரிக்காவுக்கும் சில வசதிகளைச் செய்துகொடுக்க முன்வந்தது. அதைப்பற்றியெல்லாம் இவர்கள் ஒருபோதும் வாய்திறக்கமாட்டார்கள்.

1962இல் இந்தியாவுக்கும் சீனாவுக்கும் இடையில் எல்லை யுத்தம் நடைபெற்ற பொழுது, இரு நாடுகளையும் சமரசப்படுத்தும் முயற்சியில் அப்போதைய இலங்கைப் பிரதமர் சிறீமாவோ பண்டாரநாயக்க ஈடுபட்டார். ஆனால் தமிழரசுக் கட்சியினர் ஒருதலைப்பட்சமாக சீனாதான் இந்தியாவை ஆக்கிரமித்துவிட்டது எனப் பிரச்சாரம் செய்துகாண்டு, கொழும்பிலுள்ள சீனத் தூதரகம் முன்பாக ஆர்ப்பாட்டம் செய்யப்போய் கொழும்புத் துறைமுகத் தொழிலாளர்களினால் விரட்டப்பட்டு ஓடி வந்தனர்.

1970களில் சீன அரசாங்கம் கொழும்பில் பண்டாரநாயக்கவின் பெயரில் ஒரு சர்வதேச மாநாட்டு நினைவு மண்டபத்தைக் கட்டிக்கொடுத்தபோது, அதைக் கட்ட வந்த சீனர்கள் கொண்டு வந்து கொடுத்த ஆயுதங்களைப் பயன்படுததியே ஜே.வி.பி. 1971 ஏப்ரலில் ஆயுதக் கிளர்ச்சி செய்ததாகப் பொய்ப்பிரச்சாரம் செய்தனர்.

அம்பந்தோட்டையில் துறைமுகம் ஒன்றையும், மத்தளவில் சர்வதேச விமான நிலையம் ஒன்றையும் சீனா அமைத்துக் கொடுத்தபோது, அதனால் இந்தியாவுக்கு ஆபத்து என ஓலமிட்டனர். (இருந்தும் சீனர்களை உளவு பார்ப்பதற்காக இந்தியா அம்பாந்தோட்டையில் துணைத் தூதரகம் ஒன்றை அமைப்பதற்கு இலங்கை அரசாங்கம் அனுமதி வழங்கியது) அதேபோல, கொழும்பில் மிக உயரமான ‘தாமரைக் கோபுரம்’ சீனாவால் நிர்மாணிக்கட்டபோதும், அது உயரத்தில் இருந்து கொண்டு இந்தியாவை உளவு பார்ப்பதற்குத்தான் என்றனர். கொழும்பு துறைமுக நகரைச் சீனா நிர்மாணித்தபோதும், அதனால் இந்தியாவுக்கு ஆபத்து என்றனர்.

கொழும்பு துறைமுகத்தின் கிழக்கு முனையப் பொறுப்பை இந்தியாவுக்கும் யப்பானுக்கும் வழங்குவதற்கு முன்னைய இலங்கை அரசு ஒப்பந்தம் செய்திருந்தபோதும், துறைமுகத் தொழிலாளர்கள் முழுப்பேரினதும், மக்களினதும் ஏகோபித்த எதிர்ப்பால் அதை இரத்துச் செய்யவேண்டிய நிர்ப்பந்தம் இலங்கை அரசுக்கு உருவாகியது. அதையும் அரசாங்கத்தில் இந்திய விரோதச் செயல் என்றனர். அப்படியானால் இலங்கை மக்கள் விருப்பு வெறுப்பு ஏதுமின்றி கைகளைக் கட்டிக்கொண்டு சும்மா இருக்க வேண்டும் என்பதா இவர்களது எண்ணம்? இருந்தும் அரசாங்கம் துறைமுகத்தின் மேற்கு முனையத்தை இந்தியாவுக்கு வழங்க முன்வந்துள்ளது.

அதேநேரத்தில், இலங்கையின் வடக்குக் கடலில் இந்திய மீனவர்கள் தொடர்ச்சியாக அத்துமீறி மீன்பிடிப்பது பற்றியோ, அதனால் வட பகுதி தமிழ் மீனவர்கள் பாதிக்கப்படுவது பற்றியோ இந்தத் தமிழ் அரசியல்வாதிகள் எதுவும் பேசமாட்டார்கள். ஆனால் தென்னிலங்கை மீனவர்கள் அங்குவந்து மீன்பிடித்தால் (அதுவும் தவறு என்றபோதும்) கூப்பாடு போடுவார்கள்.

அதேபோல, அமெரிக்காவுக்கோ அல்லது மேற்கு நாடுகளுக்கோ இலங்கையின் வளங்களைத் தாரைவார்த்தால், அதுபற்றி ஒன்றும் பேசமாட்டார்கள், உள்ளுர மகிழ்ச்சி அடைவார்கள். சீன எதிர்ப்பு பேசும் இவர்கள், அமெரிக்கா அவுஸ்திரேலியாவையும் யப்பானையும் சேர்த்துக்கொண்டு ‘இந்தோ – பசுபிக் உடன்படிக்கை’ என்ற பெயரில் சீனாவுக்கு எதிராக அமைத்துள்ள இராணுவக்கூட்டில் இந்தியாவும் இணைந்திருப்பதில் எல்லாம் இவர்களுக்கு அக்கறை கிடையாது.

எதற்கெடுத்தாலும் சீன விரோதக் கூச்சல் கிளப்புவது இலங்கை தமிழ் அரசியல்வாதிகளின் தொடர்ச்சியான தொழிலாகப் போய்விட்டது. அவர்களின் இந்த ‘சீனோப்பியா’ வியாதிக்குக் காரணம், அவர்கள் மத்தியில் நீண்டகாலமாக புரையோடிப் போய்விட்ட சோசலிச எதிர்ப்புணர்வும், ‘இந்தியா எங்கள் தாய்நாடு’ என்ற உணர்வும்தான்.

நன்றி முகநூல் *தோழர் மணியம் சண்முகம்

»»  (மேலும்)

இணைய வழி கருத்தரங்கம் - பெண்கள்மட்டும்

இலங்கையில்  இனங்களுக்கிடையிலான நல்லிணக்கத்தின் அவசியம் குறித்து எதிர்வரும் சனியன்று இணையவழி கருத்தரங்கு ஒன்று இடம்பெறவுள்ளது. இலங்கை நேரம் மாலை  7.30 மணிக்கு இவ்வரங்கு ஆரம்பமாகும். இந்நிகழ்வினை புகலிட பெண்கள் சந்திப்பு குழுவினர் ஏற்பாடுசெய்துள்ளனர்.

»»  (மேலும்)

கொத்தியாபுலை கலைவாணி வித்தியாலயம் 1C பாடசாலையாக தரமுயர்வு

மட்டக்களப்பு மண்முனை மேற்கு கல்வி வலயத்திற்கு உட்பட்ட கொத்தியாபுலை கலைவாணி வித்தியாலயம் 1C பாடசாலையாக தரமுயர்த்தப்பட்டுள்ளது.

பாடசாலையினை தரமுயர்த்துவது தொடர்பில் பாடசாலைச் சமூகமும் பொது மக்களும் பாராளுமன்ற உறுப்பினரும் மாவட்ட அபிவிருத்திக்குழுத் தலைவருமான சிவநேசதுரை சந்திரகாந்தனிடம் முன்வைத்த கோரிக்கையின் பலனாக type 3 பாடசாலையாக இருந்து தற்போது 1C பாடசாலையாக தரமுயர்த்தப்பட்டுள்ளது.

இதுவரை காலமும் க.போ.த சாதாரண தரம் வரை மாத்திரம் கல்வி பயிலக் கூடியதாக இருந்த இப் பாடசாலையானது க.பொ.த உயர்தரத்தில் கலைப்பிரிவுவரை கற்கக்கூடிய வகையில் தரம் உயர்த்தப்பட்டுள்ளது என்பது குறிப்பிடத்தக்கது.

இதன் மூலம் அங்குள்ள கலைப்பிரிவில் ஆர்வம் கொண்ட மாணவர்கள் நீண்ட தூரம் பயணம் செய்து மட்டக்களப்பிற்கு வரவேண்டிய தேவை குறைக்கப்பட்டு அங்குள்ள பாடசாலையிலே தங்களது கல்வி நடவடிக்கைகளை தொடர கூடிய நடவடிக்கை முன்னெடுக்கப்பட்டுள்ளது.

»»  (மேலும்)

நாளை மட்டக்களப்பு வருகின்றார் வர்த்தக அமைச்சர்

மட்டக்களப்பு பாளுமன்ற உறுப்பினரும் மாவட்ட ஒருங்கிணைப்பு குழு இணைத்தலைவருமாகிய சி.சந்திரகாந்தனது அழைப்பினை ஏற்று நாளை மட்டக்களப்பு வருகின்றார் வர்த்தக அமைச்சர்.

வர்த்தக அமைச்சர் பந்துல குணவர்த்தன அவர்களினால் மட்டக்களப்பு மாவட்டத்துக்கான வர்த்தக பொது கூட்டுத்தாபனத்தினுடைய காட்சிசாலை

மற்றும் உணவு ஆணையாளர் திணைக்களத்தினுடைய மட்டக்களப்புக்கான கிளை என்பன திறக்கப்படவுள்ளன.

»»  (மேலும்)

வேறு நாடொன்றின் கட்சி எமது தேர்தலில் போட்டியிட முடியாது

வேறு நாடு ஒன்றின் கட்சி எமது நாட்டில் பதிவு செய்வதற்கோ தேர்தலில் போட்டியிடுவதற்கோ முடியாது என தேர்தல்கள் ஆணைக்குழுவின் தலைவர் நிமல் புஞ்சிஹேவா தெரிவித்தார்.

இலங்கைக்குள் பாரதிய மக்கள் கட்சியை அமைப்பதற்கு திட்டமிட்டுள்ளதாக தெரிவிக்கப்படும் செய்தி தொடர்பாக கருத்து தெரிவிக்கையிலேயே இவ்வாறு குறிப்பிட்டார்.

இது தொடர்பாக மேலும் கூறுகையில், 

வெளிநாட்டு கட்சி ஒன்று இலங்கைக்குள் கிளைகளை அமைத்து தேர்தலில் போட்டியிட முடியாது. அவ்வாறான கட்சி ஒன்றை பதிவு செய்யவும் முடியாது. அது எமது நாட்டு கட்சி ஒன்றாக இருந்தால் இலங்கை பிரஜைகளால் கட்சி ஒன்றை அமைத்து, கடந்த 4 வருடங்களாக கட்சியாக செயற்பட்டு, தேர்தல்களில் போட்டியிட்டிருக்கும் பின்னணி இருக்குமாக இருந்தால்தான், அந்த கட்சியை பதிவுசெய்து ஏற்றுக்கொள்ளப்பட்ட கட்சியாக போட்டியிட முடியுமாகின்றது.

அவ்வாறு இல்லாமல் எந்தளவு பிரபலமான கட்சியாக இருந்தாலும் நாட்டுக்குள் கிளைகளை அமைத்து தேர்தல்களில் போட்டியிட முடியாது. அத்துடன் அவ்வாறான கட்சிகள் இலங்கையில் கட்சியொன்றுடன் கூட்டணி அமைத்து தேர்தலில் போட்டியிடவும் சட்டத்தின் பிரகாரம் முடியாது.

எமது சட்டத்தின் பிரகாரம் நாட்டுக்குள் இருக்கும் கட்சிகள் கூட்டணிகளை அமைத்துக்கொள்ள முடியும். ஆனால் வெளிநாட்டு கட்சிகளுடன் கூட்டணி அமைத்து தேர்தல்களில் போட்டியிட முடியாது என்றார்.

»»  (மேலும்)

யாழ்- அகற்றுச்சங்கம் ஒரு வரலாற்றுப்பதிவு

பகிரங்கமாக அலுவலகம் வைத்து செயல்பட்ட “யாழகற்றுச் சங்கம் 

கிழக்கு மாகாணத்தில், குறிப்பாக மட்டக்களப்பு மாவட்டத்தில், யாழ்ப்பாணத்தவர்களுக்கு எதிரான உணர்வுகளைச் சிலர் தூண்டி விடுகிறார்கள் என யாழ்ப்பாணியர்கள் சிலர் ஆதங்கப்படுவதை அவதானிக்க முடிகிறது.

மட்டக்களப்பில் சில பகுதியினரிடையே யாழ்ப்பாண எதிர்ப்பு அல்லது வெறுப்பு உணர்வு இருப்பது இரகசியமான விடயமல்ல. அது இன்று நேற்று ஏற்பட்டதுமல்ல. நான் அறிய அந்த உணர்வு இருப்பதை நான் எமது புரட்சிகர கம்யூனிஸ்ட் கட்சி வேலைகளுக்காக முதன்முதலாக 1960களின் பிற்பகுதியில் அங்கு சென்றபோதே அவதானித்திருக்கிறேன்.சரி, அது ஒருபுறமிருக்க - 

ஆனால் இனி நான் சொல்லப்போவது இன்று தமிழ் தேசியப் போராட்டம் நடத்தும் பலருக்கும் தெரியாததும், அதேநேரத்தில் ஆச்சரியம் தரும் விடயமாகவும் இருக்கும்.

ஏன் நாம் மட்டக்களப்புக்கு ஓடுவான்? வன்னியில் யாழ்ப்பாண எதிர்ப்பு உணர்வு இருப்பது உங்களில் எத்தனை பேருக்குத் தெரியும்? அதுமட்டுமின்றி, 60கள் 70களில் வவுனியா பஸ் நிலையத்தில் “யாழகற்றுச் சங்கம்” என்ற பெயர் பலகையுடன் யாழ்ப்பாணத்தாருக்கு எதிராக ஒரு அலுவலகம் செயற்பட்டது உங்களில் எத்தனை பேருக்குத் தெரியும்? ஆனால் உண்மை. அதை நான் நேரடியாகவே கண்டிருக்கிறேன்.

அந்த அலுவலகத்தை நடத்தியவர் வேறு யாருமல்ல, ஜீ.ஜீ.பொன்னம்பலத்தால் “வன்னி நாம்பன்” என அழைக்கப்பட்டவரும், அவரது தமிழ் காங்கிரஸ் கட்சியின் வவுனியா தொகுதி பாராளுமன்ற உறுப்பினருமான தா.சிவசிதம்பரம் என்பவர்தான். (தமிழ் காங்கிரசில் உடுப்பிட்டி தொகுதி எம்.பியான மு.சிவசிதம்பரமும் இருந்தார். அவரை பொன்னம்பலம் “உடுப்பிட்டி சிங்கம்” என அழைப்பார்)

இந்த தா.சிவசிதம்பரம் வவுனியா பாராளுமன்ற உறுப்பினரானதே ஒரு தனிக் கதை. 1956 தேர்தலில் வவுனியா தொகுதியில் கொழும்பு பல்கலைக்கழகத்தின் முன்னாள் கணிதப் பேராசிரியரும் (இவர் எலிசபெத் மாகாராணிக்கு கணக்குப் படிப்பித்தவர் என்ற ஒரு போலிக்கதையும் நம்மவர் மத்தியில் உலா வருவதுண்டு), பிற்காலத்தில் ‘அடங்காத் தமிழர் முன்னணி’ என்ற பெயரில் கட்சி ஒன்றை ஆரம்பித்தவருமான சி.சுந்தரலிங்கம் வெற்றி பெற்று எம்.பியானார். இந்த அடங்காத் தமிழர் வவுனியாவில் எம்.பியாக இருந்த காலத்தில் அங்கு பல நூறு ஏக்கர் காணிகளையும், ஒரு சில குளங்களையும் தனதுடமையாக்கியும் இருக்கிறார். அது தனிக்கதை. (இந்த ‘கணித மேதை” சுந்தரலிங்கம்தான் 1960களில் மாவிட்டபுரம் ஆலயப்பிரவேசப் போராட்டத்தின் போது சாதி வெறியர்களுக்காக ஆட்டம் போட்டவர்)

இந்தச் சுந்தரலிங்கத்தைத் தோற்கடித்து தான் வவுனியா எம்.பியாக வந்துவிட வேண்டும் என்பது தா.சிவசிதம்பரத்தின் தணியாத தாகமாக இருந்தது. அதற்கான சந்தர்ப்பத்தை சுந்தரலிங்கமே ஏற்படுத்திக் கொடுத்தார். 1960இல் நடைபெற்ற தேர்தலில் (மார்ச் - யூலை என இரண்டு தேர்தல்கள்) சுந்தரலிங்கமும் சிவசிதம்பரமும் எதிரெதிராகப் போட்டியிட்டனர். சிவசிதம்பரம் ‘ஒறியினல்’ வன்னியான் (அவரது பூர்வீகம் முல்லைத்தீவு மாவட்டத்திலுள்ள தண்ணீரூற்று கிராமம். அங்குள்ள புற்றளையார் குடும்ப பரம்பரையைச் சேர்ந்தவர்) என்றபடியால் சுந்தரலிங்கத்தைவிட சிவசிதம்பரத்துக்கு ஆதரவு அதிகமாக இருந்தது.

இதைப் பொறுக்காத சுந்தரலிங்கம், “வன்னியாங்கள் வைக்கல் கத்தையைக் கண்ட மாடுகள் போல சிவசிதம்பரத்தின் சாராயத்துக்காக அவர் பின்னால் ஓடுறாங்கள்” என ஒரு பொதுக்கூட்டத்தில் பேசிவிட்டார்.

கிடைத்தது சிவசிதம்பரத்துக்குப் பிடி. அவர் உடனே, “வன்னியானை மாடுகள் எனச் சொன்ன யாழ்ப்பாணத்தான் சுந்தரலிங்கத்துக்கா வாக்குப் போடப்போகிறீர்கள்?, மானமுள்ள வன்னி மக்களே?” எனக் கேள்வி கேட்டுப் பதிலடி கொடுத்தார்.

அவ்வளவுதான் சுந்தரலிங்கம் வவுனியாவிலிருந்து ‘அவுட்’. பின்னர் 1965 தேர்தலிலும் சுந்தரலிங்கம் அங்கு போட்டியிட்டு சிவசிதம்பரத்திடம் மண் கவ்வினார். (அதன் பின்னர் இன்றுவரை யாழ்ப்பாணத்தைப் பூர்வீகமாகக் கொண்ட எவரும் வவுனியாவில் வெற்றி பெறவில்லை என நினைக்கிறேன்) அந்த நேரத்தில்தான் வன்னி மக்களுக்கு தொடர்ந்து யாழ்ப்பாண எதிர்ப்பு உணர்வை ஊட்டுவதற்காக இந்த ‘யாழகற்று சங்க’ அலுவலகத்தை வவுனியா பஸ் நிலையத்தில் ‘வன்னி நாம்பன்’ திறந்து வைத்தார். நான் 1970 – 71 காலகட்டத்தில் வவுனியா மாவட்டத்தில் உள்ள சுமார் 25 கிராமங்களில் அரசியல் வேலை செய்த பொழுது, அந்தக் கிராமத்தவர்கள் மத்தியில் யாழ்ப்பாண எதிர்ப்பு உணர்வு மறைமுகமாக இருந்ததை அவதானித்துள்ளேன்.

யாழ்ப்பாணத்தவர்களுக்கு மட்டக்களப்பில் மட்டுமின்றி, வன்னி, மலையகம், தென்னிலங்கை என எல்லா இடங்களிலும் எதிர்ப்பு இருப்பதற்கு அவர்களது கடந்தகால வரலாறுதான் காரணம். இலங்கையை ஆண்ட பிரித்தானியர் சிங்களவர்களையும் தமிழர்களையும் திட்டமிட்டுப் பிரிப்பதற்காக தமிழர்களுக்கு அதிக கல்வி வாய்ப்பைக் கொடுத்தனர். அதனால் இலங்கை முழுவதும் யாழ்ப்பாணத் தமிழர்களே சகல துறைகளிலும் அரசாங்க அதிகாரிகள் ஆனார்கள். மற்றப் பக்கத்தில் யாழ் மாவட்டத்தில் நிலவிய வளப்பற்றாக்குறை காரணமாக பிழைப்புக்காக பலர் தென்னிலங்கைக்குச் சென்று வியாபாரம் செய்யத் தொடங்கினார்கள். 

அதாவது, நாட்டின் ஏனைய பகுதி மக்கள் யாழ்ப்பாணத்தவர்களில் ஒரு பகுதியினரை அதிகாரம் செலுத்துபவர்களாகவும், இன்னொரு பகுதியினரைத் தம்மைச் சுரண்ட வந்தவர்களாகவும்தான் பார்த்தனர். அதனால் எழுந்த வெறுப்புத்தான் யாழ்ப்பாணியர் எதிர்ப்பாகப் பின்னர் பரிணாமம் அடைந்தது.

அதுமட்டுமின்றி, அந்தக் காலத்தில் தென்னிலங்கையில் உத்தியோகம் பார்த்த, வியாபாரம் செய்த பல யாழ்ப்பாணத்தவர்களின் வீடுகளில் சிங்கள இனத்தைச் சேர்ந்த ஒரு அப்புகாமியோ அல்லது பொடி மெனிக்காவோதான் வேலைக்காரர்களாக கொண்டுவரப்பட்டு வைக்கப்பட்டிருந்தனர். 1956இல் பண்டாரநாயக்க ஆட்சிக்கு வந்ததும் அந்த நிலைமை மாறியது. பின்னர் அந்தச் சிங்கள வேலைக்காரர்களின் இடத்தில் மலையகத்தைச் சேர்ந்த இராமசாமியோ அல்லது மீனாட்சியோ வேலைக்கு அழைத்து வரப்பட்டனர். இப்பொழுது அந்த நிலையும் மாறிவிட்டது.

இவையெல்லாம் உள்ளடங்கி இருப்பதுதான் “ஆண்ட தமிழினம் மீண்டுமொருமுறை ஆள நினைப்பதில் தவறென்ன?” என்ற கோசம். எனவே, விருப்பு வெறுப்புகளை ஒருபக்கம் தள்ளி வைத்துவிட்டு, எமது கடந்தகால வரலாற்றை சுய விமர்சன ரீதியாகப் பரிசீலனை செய்வதே இன்றைய தேவையாகும்.

நன்றி முகநூல் *தோழர் மணியம் 

»»  (மேலும்)

மட்/முதல்வரின் வீட்டு வேலையாட்களுக்கு மாநகரசபை சம்பளம்

மட்டக்களப்பு மாநகர முதல்வர் சரவணபவனின் வீட்டு வேலைகளைச் செய்வதற்காக அமர்த்தப்பட்டிருந்த இரண்டு தொழிலாளர்களுக்கு மாநகரசபை ஊடாக சம்பளம் வழங்கப்பட்டு வந்த செய்திகள் அம்பலமாகியுள்ளன. இதனைத்தொடர்ந்து இதுவரை அவர்களுக்காக மாநகர சபையால் செலவு செய்யப்பட்ட இருபது இலட்சம் ரூபாய்களையும் திருப்பி அறவிட ஆணையாளரால் நடவடிக்கை எடுக்கப்பட்டுள்ளது.

மேலும் முதல்வரின் தனிப்பட்ட செல்வாக்கை சமூக வலைத்தளங்கள் ஊடாக உயர்த்துவதற்காக பணிகளில் ஈடுபடுத்தப்பட்டிருந்த மாநகரசபை சுகாதாரத் தொழிலாளியும் நீக்கப்பட்டுள்ளனர்.

முதல்வர் பயன்படுத்தி வந்த இரண்டு சொகுசு வாகனங்களில் ஒன்று ஆணையாளரால் கையேற்கப்பட்டுள்ளது.

மக்களின் வரிப்பணத்தை சூறையாடிவந்த முதல்வருக்கு எதிராக புதிய ஆணையாளர் எடுத்துவரும் நடவடிக்கைகளுக்கு பொதுமக்களின் ஆதரவு பெருகிவருகின்றது.

»»  (மேலும்)

ஜனாதிபதி ஆணைக்குழுவின் ஆணையாளராக யோகேஸ்வரி நியமனம்..

இலங்கையில் இறுதிப்போரின்போது இடம்பெற்றதாக கூறப்படும் மனித உரிமை மீறல்கள் தொடர்பாகவும், பொறுப்புக்கூறல் விடயங்கள் குறித்தும் ஆராய்வதற்காக நியமிக்கப்பட்ட ஆணைக்குழுக்களின் அறிக்கைகளை மீண்டும் பரிசீலிப்பதற்காக ஜனாதிபதி கோட்டாபய ராஜபக்சவால் நியமிக்கப்பட்ட ஆணைக்குழுவின் ஆணையாளராக யாழ். மாநகர சபையின் முன்னாள் மேயரும், தற்போதைய உறுப்பினருமான யோகேஸ்வரி பற்குணராசா நியமிக்கப்பட்டுள்ளார்.

இது தொடர்பான அதிவிசேட வர்த்தமானி அறிவித்தல் நேற்று வெளியாகியுள்ளது.

»»  (மேலும்)

கிழக்கு பல்கலைக்கழக சுவாமி விபுலாநந்தர் கற்கை நிறுவனத்தின் பணிப்பாளராக பாரதி நியமனம்

கிழக்கு பல்கலைக்கழக சுவாமி விபுலானந்தர் கற்கை நிறுவகத்தின் புதிய பணியாளராக திருமதி. பாரதி கென்னடி நியமிக்கப் பட்டுள்ளார். இவருக்கான நியமனக் கடிதம் பல்கலைக்கழக மானியங்கள் ஆணைக்குழுவால் வழங்கப்பட்டுள்ளது.

இலங்கை வானொலி புகழ் நாடக தயாரிப்பாளர், எழுத்தாளர், சிறுகதை படைப்பாளி மூத்த எழுத்தாளர் ஜோர்ச் சந்திரசேகரத்தின் புதல்வியும், கிழக்கு பல்கலைக்கழக சிரேஷ்ட விரிவுரையாளரும் இலங்கை கணக்காளர் சேவை, இலங்கை நிர்வாக சேவை போன்றவற்றை சேர்ந்தவர் கலாநிதி பாரதி.

தான் தொட்ட துறைகளில் துலங்கும் வல்லமை கொண்ட மீன் மகளை வாழ்த்துவதில் மகிழ்ச்சி அடைகின்றோம்.

வாழ்த்துக்கள் கலாநிதி பாரதி.

உங்கள் கலைத்துறை ஈடுபாட்டுக்கு நல்லதொரு வாய்ப்பு.

உங்கள் முகாமைத்துவ திறனுக்கு மேலும் ஒரு சந்தர்ப்பம்.

வாழ்த்துக்கள்.

»»  (மேலும்)

டெங்கு நோய்க்கெதிரான களப்பணியில் எம்.பி

இன்று வாழைச்சேனை பிரதேச செயலாளர் பிரிவுக்குட்பட்ட பேத்தாளை கிராமத்தில் எமது பணிப்புரைக்கும், பங்குபற்றுதலுக்கும் அமைவாக பிரதேச செயலாளர் மற்றும் பிரதேச சபை தவிசாளர் ஆகியோரின் ஏற்பாட்டின கீழ் டெங்கு ஒழிப்பு சிரமதானம் ஒழுங்கு செய்யப்பட்டது.

பாடசாலைகள்,வணக்கஸ்தலங்கள்,மைதானங்கள்,மயானம் போன்ற பொது இடங்களை சென்று பார்வையிட்ட பாராளுமன்ற உறுப்பினர் சந்திரகாந்தன் சுகாதார வைத்திய அதிகாரி மற்றும் சுகாதார பொது பரிசோதகர்கள்,கிராமசேவகர் மற்றும் கிராம அபிவருத்திச் சங்க உறுப்பினர்கள்,பொதுமக்கள் ஆகியோருடன் கலந்துரையாடினார்.

எதிர்வருகின்ற காலங்களில் மாவட்டத்தில் காணப்படுகின்ற வீதிகளுக்கு புதிய வடிகால்களை அமைப்பதன் மூலமாகவும் இருக்கின்ற வடிகால்களை சரியாக சுத்தம் செய்வதன் மூலமாகவும் சரியான முறையில் மழைநீர் வடிந்தோடக்கூடிய முறைமையை உருவாக்கி மாரி காலங்களில் பாரிய பிரச்சினையாக உள்ள வெள்ள நிலைமைகளையும் தேவையற்ற விதத்தில் நீர்தேங்கி நிற்பதனையும் கட்டுப்படுத்துவதன் மூலம் நுளம்புகளின் பெருக்கத்தினையும் டெங்கு நோய் தாக்கத்தினையும் கணிசமான அளவில் குறைப்பதற்கான நடவடிக்கைகளை மேற்கொள்ளவும் நடவடிக்கைகள் மேற்கொள்ளப்பட்டன.

»»  (மேலும்)

யாழ்ப்பாணத்தை அதிரவைத்த கன்பொல்லையில் வெடித்தகுண்டு

கன்பொல்லை தியாகிகள் நினைவு

கறுப்பாகிக் கிடந்த ஈழமண்ணில் சாதிய தீண்டாமைக்கெதிரான சமத்துவத்துக்கான போராட்டத்தில் வெடிகுண்டு தயாரிக்கும்போது ஏற்பட்ட விபத்தில் வெடித்துச் சிதறிய கன்பொல்லைத் தியாகிகள் மா.சீவரத்தினம், க.செல்வராசா, கி.வேலும்மயிலும் ஐம்பத்தியோராம் ஆண்டு நினைவு. இப்போராட்டம் 1966லிருந்து1971வரை நிகழ்ந்தது.

சிவந்த வணக்கங்கள்!

இந்த நாட்களிலே சமத்துவத்துக்கான போராட்டத்தில் பதிவு செய்யப்பட்ட எட்டு வழக்குகளில் சிறை சென்ற சமூக விடுதலைப் போராளிகள். மு.தவராசா, ஆ.சிவகுரு, ந.இளையதம்பி (கிளி), இ.மார்க்கண்டன் (வாசு), ச.வல்லி (முறிகண்டி), வே.கிருஷ்ணபிள்ளை (கொழும்பான்), ப. செல்வராசா வரிசைப்பட்ட ஏழு தோழர்களையும் காயம்பட்ட ந.மார்கண்டு (பட்டி), செங்காரியப்பா, ஆ.தம்பையா, மு.அபிமன்யு, மு.பொன்னன், செங்காரி பூரணம், தம்பையா கண்ணியம்மா வேறோர் கைக்குண்டு வழக்கில் சிறை சென்ற சி.காசியன் (ஜெயம் இவர்களும் நினைவுகொள்ளப்பட வேண்டும்.

கிராமத்தில் இன்றும் நினைவுக் கூட்டமும் அதனையொட்டிய நினைவுகளும் நடைபெறுகின்றன. புதிய ஜனநாயக மாக்சிச லெனினிசக் கட்சித் தோழர் செந்தில் கலந்து நினைவுப் பேருரை ஆற்றியுள்ளார்.

தகவல் முகநூல் சத்தியதாஸ்

»»  (மேலும்)

சுமந்திரனுக்கு 'விசேட' பாதுகாப்பை மீண்டும் வழங்கவேண்டும்- சஜித்தும் ஹக்கீமும் கூட்டாக கோரிக்கை

எம்.ஏ. சுமந்திரனுக்கு வழங்கப்பட்டிருந்த விசேட பாதுகாப்பு நீக்கப்பட்டுள்ளது. அவரின் பாதுகாப்பை கருத்திற்கொண்டு மீண்டும் உரிய பாதுகாப்பை வழங்க வேண்டுமென எதிர்க்கட்சி தலைவர் சஜித் பிரேமதாச உட்பட எதிர்க்கட்சி உறுப்பினர்கள் சபாநாயகரிடம் கேட்டுக்கொண்டனர். 

பாராளுமன்றத்தில் நேற்று (10) எதிர்க்கட்சி தலைவர் சஜித் பிரேமதாச விசேட கூற்றொன்றை முன்வைத்து தெரிவிக்கையில்,

தமிழ் தேசிய கூட்டமைப்பு உறுப்பினர் எம். ஏ.சுமந்திரனுக்கு வழங்கப்பட்டிருந்த விசேட பாதுகாப்பு நீக்கப்பட்டுள்ளது. அவரது உயிர்பாதுகாப்பை கருத்திற்கொண்டே விசேட பாதுகாப்பு வழங்க தீர்மானிக்கப்பட்டிருந்தது. அவர் பாதயாத்திரை சென்றதை அடிப்படையாகக் கொண்டு அவரது பாதுகாப்பை நீக்குவது ஒழுக்கமான செயலல்ல. அதனால் அவருக்கு இருந்த பாதுகாப்பை மீண்டும் வழங்க நடவடிக்கை எடுக்கவேண்டும் என்றார்.

»»  (மேலும்)

வாகரையில் வாகை சூடிய தமிழ் மக்கள் விடுதலை புலிகள்

இன்று வாகரை பிரதேச சபையினுடைய புதிய தவிசாளராக தமிழ் மக்கள் விடுதலை புலிகள் கட்சியினை சேர்ந்த பிரதேசசபை உறுப்பினர் கௌரவ.கண்ணப்பன் கணேசன்(சூட்டி) அவர்கள் போட்டி இன்றி தெரிவுசெய்யப்பட்டார். இப் பிரதேச சபையானது 18 உறுப்பினர்களை கொண்ட சபையாகும்.

இதன் அடிப்படையில் தமிழ் தேசிய கூட்டமைப்பின் ஆளுகையில் இருந்த பிரதேசசபையின் அதிகாரம் தமிழ் மக்கள் விடுதலைப் புலிகள் கட்சினால் கைப்பற்றப்பட்டது, கிழக்கு மாகாணம் இயல்புக்கு திரும்பிய பின்னர் 2008ஆம் ஆண்டு பிரதேச சபைக்கான தேர்தலிலும் வாகரை பிரதேச சபையின் தவிசாளராக தெரிவாகியிருந்தவர் கணேசன் என்பது குறிப்பிடத்தக்கது.

»»  (மேலும்)

மட்/வெல்லாவெளி தும்பாலை- விவேகானந்தபுரம் பாலம்

மட்/வெல்லாவெளிபிரதேசத்திலமைந்துள்ள தும்பாலை- விவேகானந்தபுரம் ஆகிய இரண்டு கிராமங்களையும் இணைக்கும் வீதிக்கான பாலம் அமைக்கப்படவுள்ளது.

குறித்த பாலமானது மட்/பாராளுமன்ற உறுப்பினர் சி.சந்திரகாந்தன் அவர்களின் பணிப்புரைக்கு அமைவாக நிர்மாணிக்கப்படவுள்ளது அத்தோடு வரும் நாட்களின் அந்தவீதிக்கு 1Km கொங்கிறீட் பாதையும் அமைக்கப்பட நடவடிக்கை மேற்க்கொள்ளப்பட்டுள்ளது.

இப்பாலம் அமைக்கப்படும்போது பெரும்பாலான ஏழைவிவசாயிகள் பயனடைவர் என்பதோடு விவசாய உற்பத்தியும் விரிவடையும் என எதிர்பார்க்கப்படுகின்றது.

»»  (மேலும்)

யாழ். பாலியல் மாற்று அறுவைச் சிகிச்சை வெற்றியளித்துள்ளது

யாழ். போதனா வைத்தியசாலையில் முதற்தடவையாக மேற்கொள்ளப்பட்ட பாலியல் மாற்று அறுவைச் சிகிச்சை வெற்றியளித்துள்ளது.

மட்டக்களப்பு பகுதியைச் சேர்ந்த இளைஞனே இவ்வாறு அறுவைச் சிகிச்சை மேற்கொண்டுள்ளார்.

இந்த அறுவைச் சிகிச்சையை விசேட வைத்திய நிபுணர் இளஞ்செழியன் பல்லவன் சுமார் 12 மணித்தியாலத்தில் வெற்றிகரமாக மேற்கொண்டுள்ளார்.

»»  (மேலும்)

ஜனாஸாக்கள் அடக்கம் செய்யப்படுமா? புதைக்க இடமளிப்போம்: பிரதமர்

ஜனாஸாக்களை அடக்கம் செய்வதற்கு இடமளிப்போம் என பிரதமர் மஹிந்த ராஜபக்ஷ, பாராளுமன்றத்தில் தெரிவித்தார்

ஐக்கிய மக்கள் சக்தியின் கொழும்பு மாவட்ட பாராளுமன்ற உறுப்பினர் எஸ்.எம். மரிக்கார்,

“நீரின் ஊடாக கொரோனா வைரஸ் தொற்றுவதற்கு வாய்ப்பு இல்லையென சுகாதார இராஜாங்க அமைச்சர் சுதர்ஷினி பெர்ணான்டோபுள்ளே, பாராளுமன்றத்தில் நேற்று (09) தெரிவித்தார். அப்படியாயின், மரணமடையும் முஸ்லிம்களை புதைப்பதற்கு இடைமளிப்பீர்களா” என வினவினார்.

அதற்கு பதிலளித்த பிரதமர் மஹிந்த ராஜபக்ஷ, “ புதைப்பதற்கு இடமளிப்போம்” என்றார்.

எழுந்து நின்றிருந்த மரிக்கார் எம்.பி. “மிக்க நன்றி” எனக் கூறியமர்ந்தார்.

»»  (மேலும்)

கொரோனா தடுப்பூசி இலங்கையில் உற்பத்தி செய்வது குறித்து ஆராய்வு

கொரோனா தடுப்பூசி வழங்குவது தொடர்பில் எதிரணி விமர்சித்தாலும் அந்த செயற்பாடு வெற்றிகரமாக இடம்பெறுகிறது.அந்த மருந்தையும் இலங்கையிலேயே உற்பத்தி செய்வது குறித்து இராஜதந்திர பேச்சுக்கள் ஜனாதிபதியின் ஆலோசனைப்படி இடம்பெற்று வருவதாக கல்வி இராஜாங்க அமைச்சர் சுசில் பிரேமஜயந்த தெரிவித்தார்.

பொதுஜன பெரமுன தலைமையகத்தில் நேற்று நடைபெற்ற ஊடக மாநாட்டில் கருத்துத் தெரிவித்த அவர்,

பல்வேறு வழிகளில் எதிர்க்கட்சியினரால் விமர்சனங்கள் வெளியிடப்பட்டுள்ளன. இருப்பினும் எமது நாட்டில் மட்டுமன்றி பல நாடுகளிலும் கொவிட் தடுப்பூசிகளை வழங்குகின்ற சவால்கள் உள்ளன. கொவிட் கட்டுப்பாட்டிலேயே அனைத்து நாடுகளினதும் பொருளாதாரமும் தங்கியுள்ளது. இதுவரை ஒரு இலட்சத்து 60 ஆயிரத்திற்கும் மேற்பட்டவர்களுக்கு இலங்கையில் கொரோனா தடுப்பூசி வழங்கப்பட்டுவிட்டது. நாளையாகும்போது முதலாவது சுற்றில் எமக்கு கிடைத்த தடுப்பூசிகள் அனைத்தையும் வழங்கி நிறைவுக்கு கொண்டுவர முடியும்.

இன்னும் இரண்டு மாதங்களில் ஏற்கனவே பெற்றவர்களுக்கு இரண்டாவது தடுப்பூசி ஏற்றப்பட வேண்டும். சீனாவிலிருந்து இந்த வார இறுதிக்குள் ஒருதொகை தடுப்பூசிகள் கிடைக்கவுள்ளன. அதேபோல சுகாதார அமைச்சு, 18 மில்லியன் எஸ்ரா செனிகா தடுப்பூசிகள் இறக்குமதி செய்துள்ளது. அதற்கமைய சுமார் 10 மில்லியன் பேருக்கு மே மாதத்திற்குள் இந்த தடுப்பூசிகளை வழங்கி நிறைவுபடுத்தலாம். 4000 நிலையங்கள் இதற்காக அமைக்கப்பட்டுவருகின்றன. இந்நிலையில் 22.2 மில்லியன் மக்கள் தொகை கொண்ட எமது நாட்டில் 45 சதவீத மக்களுக்கு தடுப்பூசிகளை வழங்கிவிடமுடியும். அதேபோல ரஷ்யாவில் உற்பத்தி செய்யப்பட்ட ஸ்புட்னிக் தடுப்பூசி 100 வீதம் வெற்றியளித்திருப்பதாகவே அறியமுடிகிறது. ஆகவே அந்த மருந்தையும் இலங்கையிலேயே உற்பத்தி செய்யும் அளவுக்கான இராஜதந்திர பேச்சுக்கள் ஜனாதிபதியின் ஆலோசனைப்படி இடம்பெற்று வருகின்றன.

»»  (மேலும்)

பிள்ளையான் சறுக்கிய இடம்

சந்திரகாந்தன்  முதல்வராக இருந்த காலத்தில் பலவிதமான அபிவிருத்திகளை செய்து பெயரெடுத்தவர். யுத்தத்தால் அழிந்து கிடந்த கிழக்கு மாகாணத்தை குறிப்பாக மட்டக்களப்பை தூக்கி நிமிர்த்திய அரசியல்வாதி யாரென்று கேட்டால் எந்த குழந்தையும் சொல்லும்பெயர் பிள்ளையான். அவர் தெரிந்தவர்களுக்கும் பிள்ளையான்.தெரியாதவர்களுக்கும் பிள்ளையான்.பெரியவர்க்கும் பிள்ளையான் சிறியவர்க்கும் பிள்ளையான். அதுதான் அந்தப்பெயரின் சிறப்பு. 

அரசியல் வாதிகள் அபிவிருத்தி திட்டங்களை தொடக்கி வைக்கும் போது கல் வைப்பது வழமை. ஆனால் அதில் பல கற்கள் முளைப்பதில்லை. கடந்தகாலங்களில் மண்டூர் பாலத்துக்கு ஒருவர் வைத்த கல் இன்னும் முளைக்கவில்லை. தேர்தல்கள் வந்தால் பொய்யான வாக்குறுதிகளை கொடுத்து பலர் அபிவிருத்தி திட்டங்களுக்கு கல் வைப்பர்.  தொடக்கநாள் விழாவோடு சிலரின் பணிகள் முடிவடைந்துவிடும். ஏனெனில் சிலர் மக்களை ஏமாற்றுவதற்காக  நிதி ஒதுக்கீடு கிடைக்காமலேயே திட்டங்களை  அறிவித்து அதிகாரிகளையும் அழைத்து கல் வைத்து விடுவார்கள்  ஆனால் பிள்ளையான் அப்படியல்ல. வைத்தும் 

அவர் கல் வைத்தால் அதற்கான நிதி ஒதுக்கீடுகளை உரியகாலத்தில் பெற்றுவிடுவார். அதிகாரிகளை தூங்கவிடமாட்டார். அடிக்கடி வருகைதந்து கட்டட பணிகளில் சிறுசிறு பிழைகளைக்கூட துல்லியமாக அவதானித்து திருத்தம் கோருவார். இப்படியாக தொடங்கிவைத்த எந்த பணிகளையும் அவர் முடித்து மக்களுக்கு கையளிக்காமல் விட்டதில்லை. 

ஆனால் மட்டக்களப்பு நகரின் மத்தியில் பிரமாண்டமாக ஒரு நூலகத்தை கட்டுவதற்காக தொடக்கிவைத்தார். சுமார் 20கோடி ரூபாய்கள் திட்டமிடப்பட்டது.  அதில் சுமார் 9 கோடிகளை ஒதுக்கி ஆரம்பக்கட்ட பணிகள் நிறைவுற்ற தருணத்தில் அவரது ஆட்சிக்காலம் ஒருவருடம் முன்பாகவே கலைக்கப்பட்டது. அதன்காரணமாக அந்த வேலைத்திட்டம் முடக்கப்பட்டது.

தொடர்ந்துவந்த 'நல்லாட்சி' என்று பீத்திக்கொண்ட ரணில்- சம்பந்தன் கூட்டரசாங்கம்  அத்திட்டத்தை கைவிட்டது. வெறும் அரசியல் காழ்ப்புக்காக மிகப்பெரிய மக்கள் நல திட்டமொன்று பாழாக்கப்பட்டது.

கடந்த தேர்தலின் போது  சிறையிலிருந்த பிள்ளையான் தான்  வெல்லுகின்ற பட்ஷத்தில் மீண்டும் நூலக பணிகள் தொடங்கப்படும் என்று அறிவித்தார். அதன்படி வெற்றியடைந்ததும் ஐந்து வருட சிறையிலிருந்து வெளியேவந்த பிள்ளையான் ஒரு நாள்கூட அயர்ந்து தூங்கவில்லை.  மறுநாளிலிருந்தே ஓடத்தொடங்கினார்.  பதவிகிடைத்த பின்னர்  தேர்தல் விஞ்ஞாபனத்தை கையிலே வைத்துக்கொண்டு ஒவ்வொன்றாக பணிகளை முடிக்கிவிடுகின்றார். 

திகிலிவட்டை  பாலம் திட்டவரைபு  தொடங்கப்பட்டுள்ளது. பல பாடசாலைகள் புதிய  கட்டட தொகுதிகளுக்காக தெரிவு செய்யப்பட்டுள்ளன. கரடியனாறு விவசாய பயிற்சி பண்ணை புனரமைக்கப்படவுள்ளது. நேற்றையதினம் குடும்பிமலைப்பகுதிக்கு அருகேயுள்ள மாவெட்டுவான் அணைக்கட்டுக்கு  கல்வைக்கப்பட்டுள்ளது.

ஐந்து வருடங்களுக்கு முன்னர் எந்த இடத்தில் பிள்ளையானின் அபிவிருத்தி முயற்சியொன்று தடைப்பட்டு நின்றதோ அந்த நூலக கட்டட   பணிகள் இன்று மீள ஆரம்பிக்கப்பட்டுள்ளன. 

   

»»  (மேலும்)

600 ஏக்கர் நீர்ப்பாசனத்தை எதிர்பார்த்து மாவெட்டுவான் அணைக்கட்டு

இன்று மட்டக்களப்பு மாவட்டதில் மாயவட்டை பேரில்லாவெளி பிரதேசத்தில் அமைந்துள்ள மாவெட்டுவான் அணைக்கட்டு புனரமைபிற்கான அடிக்கல் நாட்டும் நிகழ்வானது மாவட்ட அரசாங்க அதிபர் தலைமையில் மட்டக்களப்பு மாவட்ட பாராளுமன்ற உறுப்பினரும் மாவட்ட அபிவிருத்தி குழுஇணைத் தலைவரும் தமிழ் மக்கள் விடுதலைப்புலிகள் கட்சியின் தலைவரும் ஆகிய சிவநேசதுரை சந்திரகாந்தன் அவர்களால் ஆரம்பிக்கப்பட்டது.

இந்நிகழ்வில் கோரளைப்பற்று பிரதேச சபை தவிசாளர் கௌரவ சோபா சேர் ஜெயரஞ்சித் மற்றும் திருமதி மங்கலேஸ்வரி சங்கர் (மாவட்ட அபிவிருத்தி குழு இணைத் தலைவரின் செயலாளர்) அவர்களும் கலந்து கொண்டமை குறிப்பிடத்தக்கது.

ஜனாதிபதி கோட்டபாய ராஜபக்ச அவர்களது நாட்டை கட்டியெழுப்பும் "சுபீட்சத்தின் நோக்கு" கொள்கைபிரகடனத்தின் கீழ் “நீர்ப்பாசன செழுமை”தேசிய வேலைத்திட்டம்-2021 திற்கு அமைவாக இந்த பணிகள் மேற்கொள்ளப்பட்டுவருகின்றன.

மேற்படி அணைக்கட்டு கட்டி முடிக்கப்படும் வேளையில் சுமார் 600 ஏக்கர் சிறுபோக வேளாண்மைக்குரிய நீர் பாய்ச்சல் மேலதிகமாக கிடைக்கும் என எதிர்பார்க்கப்படுகின்றது.

»»  (மேலும்)

புதிய வேளாண் சட்டங்களை திரும்பப்பெற மத்திய அரசுக்கு அக்.2 வரை கால அவகாசம்!: விவசாயிகள்

புதிய வேளாண் சட்டங்களை திரும்பப்பெற மத்திய அரசுக்கு அக்டோபர் 2ம் தேதி வரை கால அவகாசம் விதிக்கப்பட்டுள்ளதாக ராகேஷ் திகாய்ட் தெரிவித்துள்ளார். அக்டோபர் 2ம் தேதிக்கு பின் அடுத்தகட்ட போராட்டம் குறித்து அனைத்து விவசாயிகளுடன் பேசி முடிவெடுக்கப்படும். நிர்பந்தத்தின் பேரில் மத்திய அரசுடன் பேச்சுவார்த்தை நடத்த மாட்டோம் என விவசாயிகள் சங்க நிர்வாகி ராகேஷ் திகாய்ட் தெரிவித்துள்ளார்.

»»  (மேலும்)

ஆளை விடுங்க விடுங்கசாமி-ரஜனி

வரும் தமிழக சட்டமன்ற தேர்தலில் நடிகர் ரஜினிகாந்த் யாருக்கும் ஆதரவு அளிக்கமாட்டார் என ரஜினி மக்கள் மன்ற நிர்வாகி சுதாகர் தெரிவித்துள்ளார். தமிழகத்தில் விரைவில் சட்டமன்ற தேர்தல் நடைபெறவுள்ளது. இதற்கான தேர்தல் பிரச்சாரத்தில், அதிமுக, திமுக, நாம் தமிழர் கட்சி, மக்கள் நிதி மய்யம் உள்ளிட்ட கட்சியினர் தீவிரமாக ஈடுபட்டுள்ளனர். இதற்கிடையே, 2021 சட்டமன்ற தேர்தலில் பெரிதும் எதிர்பார்க்கப்பட்ட நடிகர் ரஜினிகாந்த், உடல் நலம் காரணமாக அரசியலுக்கு வரமாட்டேன் என்று திட்டவட்டமாக அறிவித்துவிட்டார். இதனால், அதிர்ச்சியடைந்த ரஜினி ஆதரவாளர்கள், இனியும் ரஜினியை நம்பி இருக்க முடியாது என்று பல மாவட்ட நிர்வாகிகள் வேறு கட்சிகளில் இணைந்தனர்.

இதன் காரணமாக, ரஜினி மக்கள் மன்றத்தில் உள்ளவர்கள் ஏதேனும் அரசியல் கட்சியில் இணைந்து செயல்பட விரும்பினால் ரஜினி மக்கள் மன்றத்திலிருந்து ராஜினாமா செய்துவிட்டு அவர்கள் விருப்பம்போல் எந்த அரசியல் கட்சியில் வேண்டுமானாலும் இணைந்து கொள்ளலாம். ரசிகராக இருக்க வேண்டும் அவர்கள் வேறு கட்சிகளில் இணைந்தாலும், அவர்கள் எப்போதும் நம் அன்பு தலைவரின் ரசிகர்கள்தான் என்பதை ரஜினி மக்கள் மன்ற உறுப்பினர்கள் யாரும் மறந்துவிடக் கூடாது என்று கடந்த மாதம் அறிக்கை வெளியிடப்பட்டது.  

இந்நிலையில், ரஜினி மக்கள் மன்ற மாவட்ட செயலாளர்களுக்கு நிர்வாகி சுதாகர் தொலைபேசியில் அளித்த தகவலின்படி, ரஜினி மக்கள் மன்ற நிர்வாகி சுதாகர் கூறுகையில், ரஜினிகாந்த் இந்த சட்டமன்றத் தேர்தலுக்கு 100% வரமாட்டார் எனவும், தேர்தலில் ரஜினிகாந்த் யாருக்கும் ஆதரவு அளிக்கமாட்டார் என்று தெரிவித்துள்ளார். மேலும், ரஜினிகாந்தின் மனைவி லதா கட்சி தொடங்குவதாக வரும் தகவல்களில் உண்மையில்லை எனவும், அர்ஜுன மூர்த்தி கட்சி தொடங்கினால் ரஜினி மக்கள் மன்றத்துக்கும் அவருக்கும் தொடர்பு இல்லை என்றும் சுதாகர் தெரிவித்துள்ளார்.

»»  (மேலும்)

மாகாண சபை தேர்தல் நடத்தப்படுவது அவசியம் - பிள்ளையான்

நாட்டை நேசிக்கும் ஒவ்வொருவரும் நம்மோடு இணைந்து பணியாற்ற வருமாறு “ஜனாதிபதி தனது சுதந்திர தின உரையில் அழைப்பு விடுத்துள்ளார். மாகாணசபைத் தேர்தல் நடத்தப்படல் வேண்டும். தமிழ் மக்கள் விடுதலைப் புலிகள் கட்சி கடந்த நல்லாட்சி அரசாங்க காலத்திலிருந்து மாகாணசபைத் தேர்தலை நடாத்துமாறு கோரிவருகின்றது.

இப்போதும் நாம் இந்த தேர்தல் நடத்தப்படல் வேண்டும் என அரசாங்கத்திடம் முன்வைத்துள்ளோம். அரசாங்கமும் தேர்தலை நடத்த வேண்டும் என்ற முயற்சியில் இறங்கினாலும் கொவிட்- 19 காரணமாக சற்று தாமதம் ஏற்பட்டுள்ளது. இந்த வருட இறுத்திக்குள் மாகாணசபைத் தேர்தலை எதிர்பார்க்கலாம். அதற்கான திட்டமிடலைத்தான் நாங்களும் செய்து கொண்டு வருகின்றோம். கிழக்கில் நானும் முதலமைச்சராக இருந்தவர். இலங்கையைப் பொறுத்தவரையில் மாகாணசபை முறைமைதான் ஏற்றுக்கொள்ளப்பட்ட தொன்றாகும். இது சட்டமாக்கப்பட்டுள்ளது. இது இந்திய அரசாங்கத்தின் தலையீட்டால் கொண்டுவரப்பட்டது.

பலவிதமான பின்னடைவுகளும், பலவீனங்களும் இருந்தாலும், மக்கள் மயப்படுத்தப்பட்ட ஒரு இயக்கமாக செயற்பட்டால் சிங்கள மக்களுக்கும் இது ஒரு பிரிவினையாக நகராது மாகாணசபை உறுதியாக வெற்றியளிக்கும்.

தமிழ் மக்கள் விடுதலைப் புலிகள் கட்சி ஒரு இணக்கப்பட்டு அரசியலை விரும்புகின்ற கட்சி. நாம் தொடர்ந்து ஜனாதிபதியின் எண்ணங்களுக்கு, செயல் வடிவம் கொடுக்கக்கூடிய ஏற்பாடுகளுடன் தொடர்ந்தும் நாம் அரசாங்கத்துடன் இணைந்து பயணிப்போம் என்றார்.

»»  (மேலும்)

கொல்லப்பட்டவர்களின்தொகை 23 லட்ஷத்தை எட்டுகின்றது

இதுவரை உலகில் கொரோனாவால் 10 கோடியே 49 லட்சத்து ஆயிரத்து 704 பேர் பாதிக்கப்பட்டுள்ளனர்.   பாதிக்கப்பட்டவர்களில்  7 கோடியே 67 லட்சத்து 73 ஆயிரத்து 459 பேர் மீண்டுள்ளனர்.

22 லட்சத்து 78 ஆயிரத்து 440 பேர் பலியாகினர்.  

»»  (மேலும்)

மியான்மரில் பேஸ்புக் இணையதள சேவைகளுக்கு இடைக்காலத்தடை

மியான்மரில் பேஸ்புக் இணையதள சேவைகளுக்கு இடைக்காலத்தடை விதிக்கப்பட்டுள்ளது.

மியான்மரில், கடந்த நவம்பர் மாதம், பொதுத் தேர்தல் நடந்தது. பார்லிமென்டின் இரு சபைகளிலும் மொத்தமுள்ள, 476 இடங்களில், 396 இடங்களைக் கைப்பற்றி, ஆங் சான் சூச்சியின் தேசிய ஜனநாயக கட்சி, அமோக வெற்றி பெற்றது. இது, 2015 பொதுத் தேர்தலில் வென்ற இடங்களைக் காட்டிலும் அதிகம். ராணுவ கட்சியாக கருதப்படும், ஒற்றுமை மற்றும் மேம்பாட்டுக் கட்சி, 33 இடங்களை மட்டுமே கைப்பற்றியது.இதையடுத்து, தேர்தலில் மோசடி நடந்துள்ளதாக, ராணுவத்தினர் தொடர்ந்து குற்றச்சாட்டுகளை முன்வத்து வந்தனர். எனினும், அதற்கான ஆதாரங்களை, அவர்களால் சமர்ப்பிக்க முடியாமல் போனது. ராணுவத்தின் குற்றச்சாட்டுகளை, மியான்மர் தேர்தல் ஆணையமும், கடந்த வாரம் நிராகரித்தது.பரபரப்பான அரசியல் சூழல் நிலவி வந்த நிலையில், மியான்மர் அரசை, ராணுவம் அதிரடியாக கைப்பற்றியது.

»»  (மேலும்)

வடமாகாணசபை முதலமைச்சர் வேட்பாளர் மாவை அல்ல -பொதுச் செயலாளர் ப.சத்தியலிங்கம் - தொடங்கியது குடும்பிச்சண்டை

தமிழ்த் தேசிய கூட்டமைப்பினதோ, தமிழ் அரசு கட்சியினதோ வடமாகாணசபை முதலமைச்சர் வேட்பாளர் யார்? என்பது இது வரை தீர்மானிக்கப்படவில்லையென இலங்கை தமிழரசுக் கட்சியின் பதில் பொதுச் செயலாளர் ப.சத்தியலிங்கம் தெரிவித்துள்ளார். 

இலங்கை தமிழரசுக் கட்சியின் அரசியல்குழுக் கூட்டம் கடந்த 30ஆம் திகதி வவுனியாவில் நடைபெற்றிருந்தது.இதன்போது, சிறிதரன் எம்.பி கருத்து தெரிவித்த போது, வடமாகாணசபை முதலமைச்சர் வேட்பாளராக மாவை சேனாதிராஜா களமிறக்கப்பட வேண்டுமென்றார். சீ.வீ.கே.சிவஞானம் அதை ஆதரித்திருந்தார்.

இந்நிலையில்,  அதை மறுத்து  முதலமைச்சர் வேட்பாளர் யார்? என்பதில் எந்த தீர்மானமும் எடுக்கப்படவில்லையென நேற்று முன்தினம் கட்சியின் பதில் பொதுச்செயலாளர் ப.சத்தியலிங்கம் தெரிவித்தார்.

 

»»  (மேலும்)

சுவிஸில் விசா பெற சோடிக்கப்பட்ட வழக்கு

தமிழ் மக்கள் விடுதலைப் புலிகள் கட்சியின் (ரீஎம்விபி) முன்னாள் பொதுச் செயலாளர் பூபாலபிள்ளை பிரசாந்தனின் விளக்கமறியல் மேலும் 14 நாட்களுக்கு நீடிக்கப்பட்டுள்ளது.

பிரசாந்தன் மீதான வழக்கு, மட்டக்களப்பு நீதவான் நீதிமன்ற நீதிபதி ஏ.சி. ரிஸ்வான் முன்னிலையில், இணையவழியூடாக நேற்று (01) விசாரணைக்கு எடுத்துக் கொள்ளப்பட்டது.

இந்தச் சந்தர்ப்பத்திலேயே பூ.பிரசாந்தனை, இம்மாதம் 15ஆம் திகதி வரை தடுப்புக் காவலில் வைக்குமாறு நீதிபதி உத்தரவிட்டுள்ளார்.

ஆரையம்பதியில் 2008ஆம் ஆண்டு இடம்பெற்ற இரட்டைப் படுகொலை தொடர்பில், சந்தேகத்தின் பேரில் கைது செய்யப்பட்டிருந்த இவர், ஏற்கனவே பிணையில் விடுவிக்கப்பட்டிருந்த நிலையில், அந்த வழக்கின் சாட்சியங்களை அச்சுறுத்தினார் என்ற குற்றச்சாட்டின்  கீழ், சட்ட மா அதிபர் திணைக்களத்தின் ஆலோசனைக்கு அமைய, 2020 நவம்பர் மாதம் 23ஆம் திகதி பிரசாந்தன் மீண்டும் கைது செய்யப்பட்டு, தொடர்ந்தும் விளக்கமறியலில் வைக்கப்பட்டுள்ளார்.‪ 

அச்சுறுத்தப்பட்டதாக  சொல்லப்படும் சாட்சிதாரரின் இரு புதல்வர்கள் அண்மையில் சுவிஸ் நாட்டில் அரசியல் தஞ்சம் கோரியுள்ளநிலையில் அவர்களின் அகதி கோரிக்கையை வென்றெடுக்க முடியும் என்று அச்சறுத்தல் குற்றச்சாட்டுக்கள் சோடிக்கப்பட்டுள்ளன. சம்பந்தன்-ரணில் ஆட்சிக்காலத்தில் மேற்படி சோடிப்புகளுக்கு தமிழ் தேசிய கூட்டமைப்பின் முக்கியஸ்தர் ஒருவர் பின்னணியிலிருந்துள்ளதாக தெரியவருகிறது. 

»»  (மேலும்)

’பொத்துவில் முதல் பொலிகண்டிக்கு முஸ்லிம்களும் ஒத்துழைக்கவும்’

பொத்துவில் தொடக்கம் பொலிகண்டி வரை ஏற்பாடு செய்யப்பட்டுள்ள, தமிழ்க் கட்சிகளின் நடைபவனி ஆர்ப்பாட்டத்துக்கு பூரண ஒத்துழைப்பை வழங்குமாறு, அகில இலங்கை மக்கள் காங்கிரஸ் தலைவர் ரிஷாட் பதியுதீன், முஸ்லிம்களிடம் வேண்டுகோள் விடுத்துள்ளார்.

சிறுபான்மை சமூகங்களுக்கு எதிரான அடக்கு முறைகளை எதிர்த்தும் கண்டித்தும் ஏற்பாடு செய்யப்பட்டுள்ள குறித்த ஆர்ப்பாட்டம், நாளை (03) தொடங்கி, 6ஆம் திகதி வரை நடைபெற உள்ளது. 

நில ஆக்கிரமிப்பு, திட்டமிட்டக் குடியேற்றம், தொல்பொருள் என்ற போர்வையில் தமிழ், முஸ்லிம் சமூகங்களின் பூர்வீக வாழிடங்களை ஏப்பமிடல், பேரினவாத அழுத்தங்களுக்கு அடிபணியும் அரசின் போக்குகள், ஜனாஸா எரிப்பு என்பவற்றைக் கண்டித்தே இந்த கண்டன நடைபவனி ஏற்பாடு செய்யப்பட்டுள்ளது. 

“சிறுபான்மையினர் என்ற வகையில், முஸ்லிம் சமூகமும் இந்த நெருக்கடிகளை எதிர்கொள்கின்றது. எனவே, எமது சகோதர சமூகம் ஏற்பாடு செய்துள்ள இந்த நடைபவனிக்கு, முஸ்லிம் சமூகமும் தமது ஒத்துழைப்பை வழங்க  வேண்டுமென அகில இலங்கை மக்கள் காங்கிரஸ் வேண்டுகோள் விடுக்கிறது” என அவர் தெரிவித்துள்ளார்.

»»  (மேலும்)

டொமினிக் ஜீவா - அஞ்சலிக் கூட்டம்.

ஈழத்தின் மூத்த முற்போக்கு எழுத்தாளரும், மல்லிகை சஞ்சிகையின் ஆசிரியரும், மல்லிகைப் பந்தல் வெளியீட்டின் பதிப்பாசிரியரும், அரசியல், சமூக செயற்பாட்டாளருமான, டொமினிக் ஜீவா அவர்களுக்கான அஞ்சலிக் கூட்டம்.

»»  (மேலும்)