அணு ஆயுதங்களை சுமந்து சென்று சுமார் 1000 கிலோ மீட்டர் தூரத்தில் உள்ள இலக்கை தாக்கி அழிக்கும் திறன் பெற்ற அதிநவீன நிர்பய் ஏவுகணை இன்று வெற்றிகரமாக சோதனை செய்யப்பட்டது.இந்திய ராணுவத்துக்கு தேவையான பல்வேறு வகையான ஆயுதங்களை பாதுகாப்பு ஆராய்ச்சி மற்றும் மேம்பாட்டு நிறுவனம் தயாரித்து வழங்கி வருகிறது. அப்படி தயாரிக்கும் ஆயுதங்கள் ராணுவத்தில் சேர்க்கப்படுவதற்கு முன்பு பலகட்டங்களாக சோதிக்கப்படுகிறது. ஏற்கனவே பல்வேறு வகையான ஏவுகணைகளை உருவாக்கி ராணுவத்துக்கு வழங்கியுள்ள பாதுகாப்பு ஆராய்ச்சி மற்றும் மேம்பாட்டு நிறுவனம் தற்போது நிர்பய் என்ற அதிநவீன ஏவுகணையை உருவாக்கியுள்ளது.
இந்த ஏவுகணை சப்–சோனிக் குரூயிஸ் ரக ஏவுகணையாகும். நிர்பய் ஏவுகணை இன்று வெற்றிகரமாக ஏவி சோதிக்கப்பட்டது. 800 முதல் 1000 கிலோ மீட்டர் தூரத்துக்கு பாய்ந்து சென்று இலக்கை தாக்கி அழிக்க வல்ல இந்த ஏவுகணை இன்று காலை ஒரிசா மாநிலம், பலாசோர் அருகே உள்ள சந்திப்பூர் ஏவுகணை பரிசோதனை மையத்தில் சோதிக்கப்பட்டது. இது நிர்பய் ஏவுகணையின் 2 வது பரிசோதனையாகும். கடந்த 2013 ம் ஆண்டு மார்ச் 12 ம் தேதி முதல் முறையாக ஏவி சோதனை செய்யப்பட்டது.
ஆனால் ஏவுகணை பறந்து சென்று கொண்டிருந்தபோது ஏற்பட்ட சிறிய தொழில் நுட்ப கோளாறு காரணமாக அந்த சோதனை பாதியிலேயே நிறுத்தப்பட்டது. இந்த ஏவுகணை முற்றிலும் பெங்களூரிலேயே தயாரிக்கப்பட்டது. வழக்கமாக இந்திய ஏவுகணைகள் ஐதராபாத்தில் உள்ள பாதுகாப்பு ஆராய்ச்சி மற்றும் மேம்பாட்டு நிறுவனத்தில் தயாரிக்கபடுவது வழக்கம். ஆனால் ஒரு மாறுதலாக நிர்பய் பெங்களூரில் வடிவடைக்கப்பட்டது. இந்திய- பாதுகாப்பு மற்றும் ஆராய்ச்சி மையத்தின் ஒரு பிரிவான பெங்களூர் ஏரோனாட்டிகல் வளர்ச்சி கழகத்தில் இந்த ஏவுகணை தயாரிக்கப்பட்டது.
ஏற்கனபே லக்சயா, நிஷாந்த், ரஸ்தம் ஆகிய ஏவுகணை தயாரிப்பில் பெங்களூர் மையம் முக்கிய பங்கு வகித்ததால் நிர்பய் ஏவுகணையை முழுவதுமாக அங்கேயே தயாரிக்க டிஆர்டிஒ அனுமதி வழங்கியது.
நிலத்தில் இருந்து அணு ஆயுதம் தாங்கி, குறிப்பிட்ட இலக்கை தாக்கும் ‘நிர்பய்’ ஏவுகணை வெற்றிகரமாக பரிசோதிக்கப்பட்டது. இன்று காலை 10.03 மணிக்கு ஒரிசா மாநிலம் பாலாசோர் கடற்கரையில் இந்த ஏவுகணை ஏவப்பட்டது. எதிர்பார்த்தபடி குறிப்பிட்ட இலக்கை தாக்கியது. இரண்டாவது முறையாக இந்த ரக ஏவுகணை பரிசோதிக்கப்படுகிறது. ஏற்கனவே பரிசோதிக்கப்பட்ட ‘யூமோஸ்’ ஏவுகணை 290 கிலோ மீட்டர் தூரம் செல்லும் திறன் கொண்டது.
அடுத்து விமானம், கப்பல் மற்றும் கடலுக்கு அடியில் இருந்து தாக்கக்கூடிய ஏவுகணைகள் தயாராகி வருகின்றன. இவற்றின் சோதனையும் விரைவில் நடைபெற உள்ளது. விமானத்தில் இருந்து ஏவக்கூடிய ‘நிர்பய்’ ஏவுகணை சுகோய் 30 ரக போர் விமானத்தில் இருந்து ஏவி பரிசோதிக்கப்பட இருக்கிறது. நிலத்தில் இருந்து தாக்கக் கூடிய ஏவுகணையை விட, விமானத்தில் இருந்து தாக்கக்கூடிய ஏவுகணை சிறிதாக இருக்கும்.
இந்த தகவலை பாதுகாப்பு ஆராய்ச்சி மேம்பாட்டு நிறுவன இயக்குனர் அவிநாஷ் சர்தர் தெரிவித்தார்.