இலங்கையின் இனப்பிரச்சினைக்கு தீர்வு காண்பதற்கு அரசால் முன்மொழியப்பட்டுள்ள நாடாளுமன்ற தெரிவுக் குழுவில் பிரதான எதிர்கட்சியான ஐக்கிய தேசியக் கட்சி பங்கு பெறாது என்று அறிவிக்கப்பட்டுள்ளது.
புதன்கிழமையன்று(6.6.12) நடைபெற்ற ஐக்கிய தேசியக் கட்சியின் நாடாளுமன்ற குழுவின் கூட்டத்திலேயே இந்த விஷயம் விவாதிக்கப்பட்டு முடிவெடுக்கப்பட்டதாக அக்கட்சியின் உறுப்பினர் இரா யோகராஜன் பிபிசி தமிழோசையிடம் தெரிவித்தார்.அந்தத் தெரிவுக் குழுவில் தமது கட்சி பங்குபெற வேண்டுமானல், தமிழ் தேசியக் கூட்டமைப்பு கலந்து கொள்ளக்கூடிய ஒரு சூழல் ஏற்படுத்தப்பட வேண்டும் என்று ஐ தே க வின் தலைவர் கடந்த நாடாளுமன்றக் கூட்டத்தில் தெரிவித்திருந்த கருத்துக்களுக்கு இதுவரை அரச தரப்பிலிருந்து எந்த பதிலும் இல்லை என்பதாலேயே இந்த முடிவு எட்டப்பட்டதாகவும் யோகராஜன் கூறுகிறார்.
நல்லிணக்க ஆணைக்குழுவின் அறிக்கையையும், அரசியல் அமைப்பின் 13 ஆவது திருத்தச் சட்டத்தையும் அடிப்படையாகக் கொண்டு புரிந்துணர்வை ஏற்படுத்த பேச்சுவார்த்தைகள் ஆரம்பிக்கப்பட வேண்டும் என்று ரனில் விக்ரமசிங்க தெரிவித்த கருத்துக்களுக்கு அரசு இணங்கினால் தமது கட்சி இந்தக் குழுவில் இடம்பெறலாம் என்று தெரிவித்திருந்தார் எனவும் யோகராஜன் சுட்டிக்காட்டினார்.
ஆனால், அரச தரப்பு இதுவரை இது தொடர்பில் நேரடியான ஒரு பதிலை வழங்கவில்லை என்றும், அப்படியான ஒரு பதிலை அரசாங்கம் வழங்கும் வரை, தெரிவிக்குழுவில் ஐக்கிய தேசியக் கட்சி பங்குபெறுவது குறித்த முடிவை எடுக்க முடியாது என்று கட்சி தீர்மானித்துள்ளதாகவும் அவர் மேலும் தமிழோசையிடம் தெரிவித்தார்.