செங்கலடி பிரதேச செயலகத்திற்குட்பட்ட குளங்களை புனர்நிர்மானம் செய்ய கிழக்கு முதல்வர் தீர்மானம்.

செங்கலடி பிரதேச செயலாளர் பிரிவுக்குட்பட்ட தற்போது பாவனைக்கு பொருத்தமற்ற வகையில் காடு மண்டி தூர்ந்து போயிருக்கும் குளங்களை புணரமைப்பு செய்வதற்காக கிழக்கு மாகாண முதலமைச்சர் சி.சந்திரகாந்தன் அவர்கள் விசேட செயல்திட்டம் ஒன்றை அமுல்படுத்தி உள்ளார். அதன் அடிப்படையில் புலுத்துமாஓடை குளம், விற்பனைமடு குளம், அரைச்சகல் குளம், நௌந்தலியாமடு குளம், விசாரைமலைக் குளம் ஆகிய 5குளங்களும் தற்போது பாவனைக்கு உதவாத வண்ணம் காடுமண்டி காணப்படுகின்றது. மேற்படி குளங்கள் புணர்நிர்மானம் செய்யப்படுவதன் மூலம் குறித்த பிரதேசத்தில் பல்லாயிரம் ஏக்கர் நெற்காணிகள் பயிர் செய்ய முடியுமென அப்பிரதேச விவசாய பெருமக்கள் தெரிவிக்கின்றனர்.

மேற்படி குளங்களை கிழக்கு முதல்வர் சி.சந்திரகாந்தன் கிழக்கு மாகாணசபை உறுப்பினர் ஏ.சி.கிருஸ்னாநந்தராஜா, தமிழ் மக்கள் விடுதலைப் புலிகள் கட்சியின் செயலாளர் ஏ.சி.கைலேஸ்வரராஜா, மற்றும் குறித்த பிரதேசத்தின் வட்டவிதானை, மற்றும் விவசாய பெருமக்கள் நேரில் சென்று பார்வையிட்டார்கள். மேற்படி குளங்களை பார்வையிட்ட சி.சந்திரகாந்தன் அவர்கள் குறித்த குளங்களை புணர்நிர்மானம் செய்வதற்கான அனைத்து வேலைகளையும் தானே முன்னெடுக்கவுள்ளதாக தெரிவித்தார்.
குறிப்பு:- பல ஆண்டு காலமாக மேற்படி குளங்கள் பயன்படுத்தபடாமல் இருந்தமையால் அக்குளங்களின் பாதைகள் செப்பனிடப்படாமல் இருந்தது. இதனால் குறித் வாகனங்கள் அப்பாதையினால் செல்வது மிகச்சிரமமாக இருந்தமையினால், மேற்படி குளங்களை பார்வையிடச்சென்ற கிழக்கு முதல்வர் சி.சந்திரகாந்தன் அவர்கள் தனது பிரத்தியேக வாகனங்களை நிறுத்திவிட்டு மோட்டார் சைக்கிளுடாக சென்று பார்வையிட்டார் என்பது குறிப்பிடத்தக்கது.