நாட்டில் 8 மாவட்டங்களில் கடும் வரட்சி; இரண்டு இலட்சம் குடும்பங்கள் பாதிப்பு

நாட்டின் எட்டு மாவட்டங்களில் நிலவிவரும் வரட்சி காரணமாக சுமார் 2 இலட்சம் குடும்பங்கள் பாதிக்கப்பட்டு ள்ளன. இவர்களுக்கு நிவாரணம் வழங்குவதற்கென 20 மில்லியன் ரூபா அவசரமாக வழங்கப்பட்டுள்ளதோடு உலர் உணவுப் பொருட்கள், குடிநீர் என்பனவும் வழங்கப்பட்டு வருவதாக அனர்த்த நிவாரண சேவைகள் நிலையப் பணிப்பாளர் சரத் பெரேரா தெரிவித்தார்.
வரட்சி காரணமாக மொனராகலை மற்றும் அம்பாறை மாவட்டங்களே கூடுதலாகப் பாதிக்கப்பட்டுள்ளதோடு பொலன்னறுவை, அம்பாந்தோட்டை, மட்டக்களப்பு, புத்தளம், மாத்தளை, குருணாகல் மாவட்டங்களும் ஓரளவு பாதிக்கப்பட்டுள்ள தாக இடர்முகாமைத்துவ நிலையம் கூறியது.

மொனராகலை மாவட்டத்தில் ஒரு இலட்சத்து 28 ஆயிரத்து 290 குடும்பங்களைச் சேர்ந்த 5,77,341 பேர் வரட்சி காரணமாக பாதிக்கப்பட்டுள்ளதோடு அம்பாறை மாவட்டத்தில் 29,792 குடும்பங்களைச் சேர்ந்த ஒரு இலட்சத்து 11,352 பேர் பாதிக்கப்பட்டுள்ளனர். இவர்கள் குடிநீர் இன்றியும் ஏனைய தேவைகளுக்கு நீர் வசதியின்றியும் பாதிக்கப்பட்டுள்ளனர்.
வரட்சியினால் பாதிக்கப்பட்டுள்ள மொனராகலை மாவட்ட மக்களுக்கு நிவாரணம் வழங்குவதற்கு 24 இலட்சம் ரூபா வழங்கப்பட்டுள்ளது. இது தவிர ஆயிரம் லீட்டர் கனவளவுடைய 50 நீர்த்தாங்கிகளும் வழங்கப்பட்டுள்ளதோடு 12 ஆயிரம் குடும்பங்களுக்கு இரு வாரங்களுக்குத் தேவையான உலர் உணவுப் பொருட்களும் வழங்கப்பட்டுள்ளன.
நீர்ப்பாசனக் கிணறுகளை புனரமைப் பதற்காக 11 இலட்சம் ரூபா வழங்கப்பட்டுள்ளதாகவும் நிவாரண சேவைகள் நிலையம் தெரிவித்தது.
இதேவேளை, அம்பாறை மாவட்டத்திற்கு ஆயிரம் கனலீட்டர் கொண்ட 81 நீர்த்தாங்கிகள் வழங்கப்பட்டுள்ளன. உலக உணவுத் திட்டத்தினூடாக கிணறுகளை புனரமைக்கவும் நடவடிக்கை எடுக்கப்பட்டுள்ளது.
மட்டக்களப்பு மாவட்டத்தில் உள்ள கிணறுகளை புனரமைக்க 2 இலட்சத்து 50 ஆயிரம் ரூபா வழங்கப்பட்டுள்ளது. பொலன்னறுவை மாவட்டத்திற்கு நிவாரணம் வழங்குவதற்காக 13 இலட்சம் ரூபா வழங்கப்பட்டுள்ளது. வரட்சியினால் பல பகுதிகளில் விவசாய நடவடிக்கைகளும் பாதிக்கப்பட்டுள்ளதாக அறிவிக்கப்படுகிறது.
தொடர்ந்து வரட்சி நீடிக்குமானால் 3 மாதங்களுக்குத் தேவையான உலர் உணவுப் பொருட்கள் வழங்கப்படுமென அனர்த்த நிவாரண நிலையம் கூறியது.
மழை எதிர்பார்ப்பு
இதேவேளை வரட்சியினால் பாதிக்கப்பட்ட பகுதிகள் உட்பட நாட்டின் பல பகுதிகளிலும் எதிர்வரும் ஓரிரு தினங்களில் இடியுடன் கூடிய மழை பெய்யுமென எதிர்பார்ப்பதாக வானிலை அவதான நிலையம் கூறியது.
நீண்ட நாட்களின் பின்னர் நேற்று முன்தினம் (27) மொனராகலையில் 9.5 மில்லி மீட்டர் மழை பெய்துள்ளது.
ஒக்டோபர் இறுதியில் ஆரம்பமாகும் மழை நவம்பர் இறுதிவரை பெய்யும் எனவும் இதன் மூலம் வரட்சி நிலை தணியுமெனவும் எதிர்பார்க்கப்ப டுகிறது.