பிரபாகரனின் பாணியில் எமது கட்சி உறுப்பினர்களை அச்சுறுத்துவதை கருணா அமைச்சர் உடன் நிறுத்த வேண்டும் - ரி.எம்.வி.பி யின் மத்திய செயற்குழு

பிரபாகரனால் வழங்கப்பட்ட பயங்கரவாதப் பெயரை வைத்துக் கொண்டு வி.முரளிதரன் அமைச்சர் அவர்கள் வன்முறைகளைப் பிரயோகித்து எமது கட்சி உறுப்பினர்களான வவுணதீவு மேற்குப் பிரதேச சபையின் தவிசாளர் காத்தமுத்து சுப்புறுமணியம் அவர்களையும், மண்முனைப் பிரதேச சபையின் தவிசாளர் திருமதி. மேரிகிறிஸ்ரினா அவர்களையும் இன்று மாலை மட்டக்களப்பு தேனகத்தில் வைத்து அச்சுறுத்துவதை உடன் நிறுத்த வேண்டும் என கட்சியின் மத்திய செயற்குழு அவசரமாக விடுத்துள்ள அறிக்கையில் தெரிவித்துள்ளது.
பயங்கரவாதத் தலைவரின் பாசறையில் வளர்ந்த வி. முரளிதரன் அமைச்சர் அவர்கள் அவ்வமைப்பில் இருந்து மேற்கொண்ட பயங்கரவாதச் செயல்களைக் கௌரவிக்கும் வகையிலேயே வி.முரளிதரன் அமைச்சர் அவர்களுக்கு அம்மான் என்ற பெயர் சூட்டப்பட்டது என்றும் அப்பெயரை பயன்படுத்தியே இன்றும் மட்டக்களப்பு பகுதியில் உள்ள ரி.எம்.வி.பி. கட்சி உறுப்பினர்களை பயங்கரவாதத் தலைவரின் ஸ்ரைலில் அச்சுறுத்தி தன்னுடன் இணைத்துக் கொள்வதற்கான அடக்குமுறை அரசியலில் ஈடுபட்டுவருவதாகவும் அவ்வறிக்கையில் மேலும் தெரிவிக்கப்பட்டுள்ளது.