புலிகளின் கடைசிக் கண்டாயமான முள்ளிவாய்க்கால் இன்றோ நாளையோ என்றிருக்கும் நிலையில் புலிகளின் முக்கிய உறுப்பினர்களான தயா மாஸ்டரும் புலிகளின் மொழிபெயர்ப்பாளரான ஜோர்ஜும் இராணுவத்திடம் சரணடைந்து விட்டார்கள் என்ற செய்தி வந்திருக்கிறது. இராணுவத்திடம் வந்ததும் எல்லோருமே புலிகளின் வன்முறை பற்றிய விடயங்களைச் சொல்ல வேண்டும் என்பது ஒருபுறமிருக்க இவ்வளவுகாலமும் புலிகளுடன் சேர்ந்திருந்த தயாமாஸ்டரும் ஜோர்ஜும் சாதாரணமக்களைப்போல் எடுத்தவுடன் பிரபாகரனையும் அவரது கொள்கைகளையும் குறைசொல்ல முடியாது. புலிகளை இராணுவம் நெருங்க இன்னும் 6கிலோமீட்டர் மட்டுமேயுள்ள நிலையில் இவர்கள் இருவரும் சரணடைந்துள்ளார்கள் என்பதும் புலிகள் மக்களுக்குத் துன்பம் விளைவிக்கிறார்கள் என்று தற்போது இவர்கள் சொல்வது வெறும் பகிடித்தனம். தமிழ்ச்செல்வன் இறந்தபின் தமக்கு அங்கு தகுந்த இடம் இல்லை என்று சொல்வது பொய். புதுமாத்தளனில் புலிகள் மக்களுக்குக் கொடுத்த துயரங்களை தாமும் அனுபவித்ததாகச் சொல்வது ஒரு ஏமாற்று. புலிகளுடன் இயங்கிக் கொண்டிருந்தவர்களை அவர்களை விட்டு விலத்தி தனியாக இருக்க புலிகள் ஒருபோதும் அனுமதிப்பதில்லை. 70,80 வயது என்றும் பாராமல் வன்னியிலிருந்த அத்தனை வயதானவர்களுக்கும் குண்டைக் கட்டிய புலிகள் இவர்களை மட்டும் விலத்தியிருக்க விட்டதாம். அதனை எங்களை நம்பட்டாம். தயாமாஸ்டர் என்ற ஆங்கிலப்புலமை கொண்ட ஒருபுத்திசாலியை புலிகள் ஒருகாலத்தில் இலங்கை அரசின் அனுமதியுடன் கொழும்பில் சிகிச்சைக்காக அனுப்பிவைத்தார்கள். அப்போதும் இவர் சிகிச்சைக்காக வரவில்லை. இலங்கை அரசுடன் பேரம் பேச வந்திருக்கிறார் என்று பலரால் சந்தேகம் கொள்ளப்பட்டவர். அப்போது கூட அவர் கொழும்பிலோ வெளிநாட்டுக்கோ தப்பியோட எண்ணவில்லை. அடுத்து ஜோர்ஜ் அவர்கள் பலநாடுகளுக்கு சமாதானம் என்ற பெயரில் போய் வந்தவர். அவருக்குக் கிடைத்த சந்தர்ப்பத்தில் அவர் நன்றாகவே ஏதேனும் ஒரு இடத்தில் தங்கியிருக்க முடியும். இவர்கள் இருவரும் நேற்றுவரை அதனைச் செய்யவில்லை. ஆக இந்த முறை இவர்கள் புலிகளிடமிருந்து தப்பி வந்தது என்பது வெறும் பொய் என்று சந்தேகம் கொள்ள வைக்கிறது. புலிகளின் இறுதி ஆயுதமாக அரசுடன் பேரம் பேச அனுப்பிவைக்கப்பட்டவர்கள் இவர்கள் என்ற சந்தேகம் எங்களிடம் வலுவாக இருக்கிறது. புலிகள் தமக்கு நெருங்கிவந்த இறுதிக் கட்டங்களை இவ்வாறான முறையில்தான் அணுகியிருக்கிறார்கள். புலிகள் தமக்கு நெருக்குவாரம் வரும்போதெல்லாம் எவரின் காலிலும் விழக்கூடியவர்கள். எதுவும் செய்யத்துணிபவர்கள் என்பது யாவருக்கும் தெரியும். அந்தவகையில் கடைசி ஆயுதமாக தயாமாஸ்டர் பயன்படுத்தப்படுகிறாரா என்பது குறித்து ஐயம் கொள்ளவேண்டும். அடுத்து புளொட் தலைவர் சித்தார்த்தன் ஜனாதிபதிக்கு எழுதிய கடிதம் குறித்து பேசவேண்டியிருக்கிறது. வவுனியா முகாம்களில் தங்கவைக்கப்பட்டுள்ள மதகுருமார்களுக்கு தனியாக வாழ ஏற்பாடு செய்து கொடுக்க வேண்டும் என்றும் அவர்களுக்குரிய அனுஸ்டானங்கள் செய்ய வசதி செய்து கொடுக்க வேண்டும் என்றும் கேட்டிருக்கிறார். மதகுருமார்கள் மற்றவர்களுடன் சேர்ந்து உணவு உண்ணமாட்டார்கள் இதனால் அவர்களைத் தனியாக வைக்க வேண்டும் என்று சொல்லியிருக்கிறார். பாரடா கதையை. பொதுவுடமை பேசிய கழகம். நாத்திகம் பேசிய கழகம.; அந்த மக்கள் விடுதலைக்கழகம் தறிகெட்டு நிக்குது பாரடா. 6மாதமாய் அலைந்து உழன்று ஒரு இடத்தில் அநாதையாய் இருக்கும் மக்கள் தமது குழந்தைகளை தமது பெற்றோரை இறப்பிலும் பிடித்து இழுத்து வந்திருக்கிறார்கள். அவர்களிலிருந்து மதகுருமார் எந்த வகையில் வேறுபடுகிறார்கள் ? பெண்களும் குழந்தைகளும் படும் துன்பம் கொஞ்சமல்ல. ஆனால் சித்தார்த்தன் மதகுருமாருக்காக கவலைப்படுகிறார். அடுத்து வவுனியாவிலுள்ள மக்களுக்கு உணவும் ஊட்டச்சத்தும் கொடுத்ததாக புளொட் அமைப்பினர் சொல்கிறார்கள். நல்லவிடையம். உங்களுக்குத்தான் மிகப்பெரிய கடமை இருக்கிறது. ஆரம்பகாலங்களில் இந்த வன்னி மக்கள்தான்; உங்களுக்கு சோறும் வாழ்விடமும் அழித்தவர்கள். அவர்களுக்கு நீங்கள் என்றும் நன்றியுடையவர்களாக இருக்க வேண்டும். அந்த மக்கள் வயல்களிலும் காடுகளிலும் வேலை செய்து உங்களுக்கு சோறு ஊட்டியவர்கள். இன்று நீங்கள் கொடுக்கும் தம்மாத்துண்டு உணவும் மருந்தும் அதற்கு ஒருபோதும் ஈடாகாது. முடிந்தவரை கொடுங்கள். கொடுத்து விட்டு தம்பட்டம் அடிக்கத்தேவையில்லை. அவர்கள் எப்போதும் நன்றியுடையவர்களாக இருப்பார்கள்.
0 commentaires :
Post a Comment